Մարդկային դաժանության զոհերը․․․
Հայաստանում թափառող կենդանիներին վնասելու համար վարչական տուգանք է սահմանված, սակայն․․․
Այսպիսի ողբերգական տեսարաններից ապահովագրված չէ որեւէ տուն, բակ կամ ընտանիք։ Բակում պառկած կամ ընդհանուր խնամքի ներքո գտնվող շանդ մի օր կարող ես հայտնաբերել կրակված։ 2019թ․-ի մարտին անհայտ անձը մտել էր մանկապարտեզի բակում հատկացված տարածք եւ կրակել եռոտանի Միքիին՝ երեխաների սիրելի ընկերոջը։ Ընդ որում, Միքին ուներ խնամողներ։ Նա վիրահատվել էր <<Փոուզիթիվ>> կենդանիների պաշտպանության հ/կ-ի ջանքերով։ Սա միակ դեպքը չէ, երբ հանրային վայրում կենդանու հանդեպ հրազեն են կիրառում։
Այս փոքրիկին այրել էին։ Պատկերացնելն անգամ սարսափելի է․․․Նրա մարմինն ամբողջությամբ վառված էր, վնասվել էին աչքերը, տեսողությունը՝ վատթարացել։
Բարեբախտաբար, սրտացավ մարդկանց եւ բժիշկների շնորհիվ շունն ապաքինվեց։ Նա որդեգրվել է ԱՄՆ-ում եւ շուտով կապրի մի ընտանիքում, որը Հայաստանից արդեն հաշմանդամություն ունեցող 4 շուն է որդեգրել:
Ենթադրաբար՝ հարվածել են այս փոքրիկի աչքին․․․
Արմավիրի մարզի Ջանֆիդա գյուղից կենդանասերները փրկել են այս շանը։ Տեղի բնակիչները փաստում են, որ շներին մշտապես կրակում են։
Անտանելի ցավերը, սակայն, այս շանը չեն խանգարել լինել հանգիստ եւ մարդամոտ: Գետնին ընկած վիճակում անգամ նա թափահարել է պոչը՝ տեսնելով իրեն օգնության եկած կենդանասերներին։
Վիրահատության ժամանակ բժիշկները նրա մարմնից հեռացրել են փամփուշտի բեկորները։ Եռոտանի հրաշքն այժմ ապաքինվում է։
Այս փոքրիկից էլ տերերը հրաժարվել են․ աչքի խնդիր ուներ: Սրտացավ մարդկանց նվիրատվությունների միջոցով նա վիրահատվել է։
Այս շանն էլ գտել է կամավոր Նունեն՝ սարսափելի վիճակում։ Տերերի կողմից լքված հերթական շունն է, որն ինքնուրույն չի կարողացել սնունդ հայթայթել և պաշտպանվել մյուս շներից։ Անասնաբուժական կլինիկայում արձանագրվել է, որ նա ունի սակավարյունություն, որը մեծ վտանգ է ներկայացնում կյանքի համար։
Հայաստանյան կենդանասերները պահանջում են քրեական պատասխանատվության ենթարկել կենդանիների հանդեպ դաժան վերաբերմունք ցուցաբերողներին՝ համոզված լինելով, որ վայրագության դեմ վարչական տուգանքն անզոր է։ Այդ նպատակով իրականացվող ստորագրահավաքին(հղումը՝ այստեղ) մասնակցել է արդեն 8,5 հազարից ավելի քաղաքացի։
ԻՍԿ ՎԵՐՋՈՒՄ
Լուսանկարները եւ տեղեկատվությունը՝ «Փոուզիթիվ» կենդանիների պաշտպանության ՀԿ-ի
Նախագծի հեղինակ՝ Լուիզա Սուքիասյան/Aravot.am
Դիմելու համար՝ հեռ․ 095 85 99 06