Սեպտեմբերի 13-ին, Հայ Առաքելական եկեղեցին նշում է Խաչվերացը (Տիրոջ խաչի վեհացում) հինգերորդ և վերջին տաղավար տոնը:
Նինոծմինդայի Սուրբ Սարգիս հայկական եկեղեցին իր դռները բացեց առավոտյան ժամը 7-ին: Հավատացյալները հավաքվել էին եկեղեցում՝ ոտքով ուխտագնացություն կատարելու դեպի Արագյալ գյուղ: Այս գյուղում է գտնվում Նինոծմինդայի մունիցիպալիտետի Սուրբ Խաչ անունը կրող միակ հայկական եկեղեցին:
Նինոծմինդայի Սուրբ Սարգիս եկեղեցու և հարակից գյուղերի հոգևոր հովիվ Տեր Արմաշ քահանա Պողոսյանը նախ պատմեց Խաչվերաց տոնի մասին, այնուհետև միասնական աղոթքից հետո ճանապարհ ընկան:
Այս տարի առաջին անգամ ուխտագնացությանը մասնակցեցին կանայք: Նինոծմինդայի պահպանողական հասարակության համար սա անսովոր երևույթ է:
«Ավանդության համաձայն, Երուսաղեմի առաջին եպիսկոպոսը՝ Հակոբը, գտնելով Քրիստոսի խաչափայտի մի մասնիկը, բարձրացրեց այն և հավատացյալներին երգով հայտնեց «Քո խաչի առջև, Քրիստո՛ս, մենք խոնարհվում ենք»: