Cefndir

Datblygwyd y strategaeth hon yn dilyn gweithgaredd ymchwil ac ymgysylltu cynhwysfawr a gynhaliom gyda’n haelodau a’n rhanddeiliaid yn gynnar yn 2017.

Hoffem ddiolch i bawb a gyfrannodd am rannu eu barnau amhrisiadwy a rhoi sylfaen i’r ddogfen hon, gan bennu llwybr Tai Pawb ar gyfer y pedair blynedd nesaf.

Mae’r dyfodol agos yn gyfnod digynsail o ran y sefyllfa gymdeithasol, economaidd a gwleidyddol heriol yr ydym yn gweithio ynddi. Mae’n hynod o gyffrous hefyd, gyda gwasanaethau newydd fel y Dyfarniad QED, prosiectau arloesol fel Drysau Agored a strwythur staffio ar ei newydd wedd.

Bydd y pedair blynedd nesaf hefyd yn wahanol iawn i ni gan y bydd ein gwaith yn symud y tu hwnt fframweithiau polisi’r Ddeddf Cydraddoldeb a deddfwriaeth hawliau dynol. Byddwn yn ymgysylltu’n gynyddol â deddfwriaeth a strwythurau datganoledig megis Deddf Llesiant Cenedlaethau’r Dyfodol, Byrddau Gwasanaethau Cyhoeddus, comisiynau a chomisiynwyr perthnasol ac, wrth gwrs, amcanion Llywodraeth Cymru a dyheadau Ffyniant i Bawb.

Edrychwn ymlaen at weithio gyda Llywodraeth Cymru, ein haelodau, ein rhanddeiliaid a chymunedau i ysbrydoli Cymru i fod yn lle tecach i fyw.

Mudiad aelodaeth ydym, gydag aelodau o’r sectorau tai, cymunedol, cydraddoldeb a sectorau perthnasol eraill yng Nghymru.

Mae ein haelodau yn darparu cartrefi a gwasanaethau sy’n gysylltiedig â thai i dros 200,000 o bobl amrywiol yng Nghymru, nifer ohonynt o gymunedau sydd yn lleiafrifol neu sydd wedi bod ar ymylon cymdeithas yn draddodiadol.

Cawn ein gwerthfawrogi fel partner ac rydym yn gweithredu’n rhagweithiol gyda’n haelodau a’r sector tai ehangach gan ddarparu arweiniad a chodi safonau ar faterion cydraddoldeb, amrywiaeth a hawliau dynol, wrth gydnabod y rhan ehangach sydd gan y maes tai i’w chwarae wrth symud ymlaen gyda chydraddoldeb, lleihau anfantais, mynd i’r afael â thlodi a hyrwyddo iechyd a llesiant.

Ni yw’r sbardun blaenllaw sy’n hyrwyddo cydraddoldeb, amrywiaeth a chyfiawnder cymdeithasol yn y maes tai yng Nghymru, ac fe’n hadnabyddir yn genedlaethol am arwain agweddau ac am ein harbenigedd gwrthrychol yn y maes.

Rydym yn dylanwadu ar ddatblygiad a gweithredu polisïau sy’n effeithio ar ba mor deg yw darpariaeth tai yng Nghymru, gyda’r nod o leihau a herio rhagfarn, anfantais a thlodi sy’n gysylltiedig â thai a sicrhau deilliannau cyfartal i bawb ym maes tai.

Rydym yn rhagweithiol, yn osodiadol ac yn canolbwyntio ar atebion ymarferol.

Ein Gwaith

Rydym yn hyrwyddo cydraddoldeb a chyfiawnder cymdeithasol ym maes tai

Rydym yn gweithio yn gadarnhaol ac yn adeiladol i ddatblygu cydraddoldeb a lleihau rhagfarn, gwahaniaethau ac ymylu ym maes tai.

Ein Pwrpas

Ysbrydoli Cymru i fod yn lle tecach i fyw

Ein Sbardun

Cred mewn cyfiawnder cymdeithasol – credwn fod hawl gan bawb i gael mynediad at gartrefi o ansawdd da mewn cymunedau diogel a chydlynol.

Angerdd dros gydraddoldeb ac amrywiaeth – credwn fod yr hyn rydym yn ei wneud yn fwy na darn o waith. Rydym yn angerddol dros newid bywydau pobl ers gwell, yn enwedig y rhai sydd ar ymylon cymdeithas.

Ymroddiad i ysbrydoli newid – rydym yn rhyngweithio gyda phobl mewn modd sy’n eu gadael yn teimlo’n barod, wedi’u grymuso, eu hysgogi a’u cefnogi i wneud pethau’n wahanol.

Canolbwyntio ar atebion – wrth herio ein hunain ac eraill i adnabod problemau, rydym yn ymdrechu i fod yn gadarnhaol a chwilio am atebion ymarferol. Rydym yn canolbwyntio ar weithredu cadarnhaol a rhagweithiol.

Ein haelodau – rydym yn gweithio ar y cyd â’n haelodau, yn gwrando arnynt, yn eu cefnogi ac yn eu herio i sicrhau bod cydraddoldeb ac amrywiaeth yn greiddiol i’r gwaith y maen nhw’n ei wneud.

Erbyn 2021, drwy ganolbwyntio ar ein hamcanion a’n blaenoriaethau, byddwn wedi gwneud cyfraniad sylweddol i wneud Cymru’n lle tecach i fyw. O ganlyniad i’n heffaith o fewn cwmpas y meysydd blaenoriaeth uchod:

• Bydd cydraddoldeb ac amrywiaeth wedi’i integreiddio mewn polisi cenedlaethol, gan arwain at symudiad ymlaen mewn hawliau a gwell tegwch i denantiaid
• Bydd cydraddoldeb ac amrywiaeth wedi’i ymwreiddio’n well yn strategaethau a gweithrediadau ein haelodau, yn mwyhau eu heffaith gadarnhaol ar gymunedau amrywiol a difreintiedig
• Bydd Tai Pawb yn cael ei ystyried yn bartner dewisol ac yn arweinydd rhagweithiol ac arloesol gan y sector a rhanddeiliaid eraill

Byddwn yn mesur ac yn adrodd yn gyhoeddus ar effaith y strategaeth hon yn flynyddol, a’n bwrdd yn derbyn adroddiadau bob chwarter. Pan bynnag fo’n bosibl, byddwn hefyd yn amlygu ein heffeithiau drwy gydol y flwyddyn ar ein sianeli cyfathrebu arferol.

Bydd ein mesurau yn cynnwys dangosyddion yn darlunio effeithiau ein hallbynnau a’n gweithredoedd neu setiau o weithredoedd yn unol â phob blaenoriaeth.

Ar lefel polisi cenedlaethol, byddwn yn ystyried i ba raddau y bydd ein hadborth a’n cyngor wedi cael ei ystyried gan Lywodraeth Cymru neu randdeiliaid allweddol eraill.

Ar lefel gweithredu, byddwn yn ystyried a yw’n cefnogaeth a’n cyngor wedi’i fabwysiadau gan ddarparwyr tai ac aelodau eraill, a’i gysylltu ag effeithiau ar denantiaid pan bynnag fo’n bosibl.

Byddwn hefyd yn defnyddio ymgysylltu ac arolygon i fesur barn ac adborth staff, y bwrdd a rhanddeiliaid am yr effeithiau a grëwn.

Adnoddau a Risg

Bydd ein capasiti i gwrdd â’n hymrwymiadau angen ei gefnogi gan gynllunio ariannol gofalus a monitro capasiti. Er y bydd ein strwythur newydd yn gwella’n gallu i fedru cyflawni ein blaenoriaethau, deallwn hefyd bod angen i ni roi mesurau eraill ar waith i sicrhau cynaliadwyedd yn y tymor hirach a lleihau risg. Bydd y strategaeth hon yn cael ei chefnogi gan:

• Cynllun busnes 4 blynedd sy’n nodi ein ffocws ar gadw a chynhyrchu incwm o ran amrywiaethu, treiddio i’r farchnad, datblygu’r farchnad a chynnyrch, oll wedi’i danategu gan ddichonolrwydd masnachol ein gweithgareddau
• Adolygiad o’n ffioedd a buddion aelodaeth sy’n canolbwyntio ar werth am arian a chadw aelodau
• Ein cynlluniau i dyfu ein haelodaeth ac ymestyn cyrhaeddiad ein gwasanaethau
• System rheoli risg mwy datblygedig ac wedi’i hadolygu, a chofrestr risg
• Mwyhau ein staff a’n capasiti ariannol yn rhagweithiol drwy ddefnyddio pob gweithgaredd i gyflawni gymaint o agweddau o’n rolau a’n hamcanion â phosibl
• Cynnig cefnogaeth ragweithiol i’n tîm i weithio’n hyblyg ac yn ddeinamig ar draws ein portffolio

Deddf Llesiant Cenedlaethau’r Dyfodol (Cymru) 2015 a Ffyniant i Bawb

Mae’r adran hon yn egluro sut mae’r amcanion a nodir yng nghynllun strategol Tai Pawb yn cyd-fynd ag, ac yn cyfrannu at, y saith nod llesiant ar gyfer Cymru. Mae darlunio’r cytgord rhwng ein hamcanion a’r ddeddfwriaeth hon, a dangos y rhan y gallwn ei chwarae mewn cynorthwyo Llywodraeth Cymru gyda ‘Ffyniant i Bawb – y strategaeth genedlaethol (2017)’, yn bwysig i fusnes Tai Pawb, a ariennir yn rhannol gan Lywodraeth Cymru.

Rydym yn ymroddedig ac yn edrych ymlaen at y posibilrwydd o hysbysu a dylanwadu ar weithrediad y polisi datganoledig newydd a’r gyrwyr deddfwriaethol am gydraddoldeb.

Pwrpas y Ddeddf yw hwyluso gwell penderfynu gan gyrff cyhoeddus o ran llesiant economaidd, cymdeithasol, amgylcheddol a diwylliannol Cymru. Cyflwynwyd pum ffordd allweddol o weithio er mwyn sicrhau bod cyrff cyhoeddus yn gweithio gyda’i gilydd i ystyried y tymor hir, i weithio i rwystro problemau rhag codi neu rhag gwaethygu, i gael ymagwedd integredig a chydweithredol, ac i ystyried a chynnwys pobl. Byddwn yn parhau i gofleidio’r ffyrdd hyn o weithio ac yn canolbwyntio ar eu hymwreiddio yn y modd rydym yn cynllunio, cyflawni, monitro ac asesu ein gwaith.

Fel rhan o’r Ddeddf, mae’n rhaid i gyrff sector cyhoeddus sydd wedi’u rhestru asesu, ymysg pethau eraill, sut mae eu hamcanion llesiant eu hunain yn cyd-fynd â’r saith nod llesiant i wneud Cymru’n wlad lewyrchus, gydnerth, iachach, mwy cyfartal, sy'n gyfrifol ar lefel fyd-eang, ac sydd â chymunedau cydlynus a diwylliant bywiog lle mae'r Gymraeg yn ffynnu. Gyda’i gilydd, mae’r saith nod llesiant a’r pum ffordd o weithio a gyflwynir gan y Ddeddf wedi’u dylunio i gefnogi a darparu gwasanaeth cyhoeddus sy’n diwallu anghenion y presennol heb gyfaddawdu ar allu cenedlaethau’r dyfodol i ddiwallu eu hanghenion hwythau.

Yn ‘Ffyniant i Bawb – y strategaeth genedlaethol (2017)’, gosododd Lywodraeth Cymru bedwar maes lle mae’n credu y gallai wneud y gwahaniaeth mwyaf i fywydau pobl Cymru wrth weithio tuag at y nodau cenedlaethol, nawr ac yn y dyfodol. Y nod yw creu Cymru ddiogel sy’n ffynnu, Cymru iach ac egnïol, Cymru uchelgeisiol sy’n dysgu, Cymru unedig a chysylltiedig.

Mae’r rhan helaeth o amcanion Tai Pawb yn cyd-fynd ag amcanion Ffyniant i Bawb, yn cynnwys mesurau sy’n anelu at: wella iechyd meddwl, lleddfu anghydraddoldeb economaidd-gymdeithasol, brwydro troseddau casineb, hwyluso byw’n annibynnol drwy gofrestrau tai hygyrch, datblygu cartrefi hygyrch sy’n gweddu at anghenion pobl ac yn lleihau digartrefedd a gwella’r sector rhentu preifat drwy ein prosiect Drysau Agored. Bydd ein cynlluniau gweithredol dros y 4 blynedd nesaf yn dangos yn fanylach sut y caiff Ffyniant i Bawb ei ategu yn ein hallbynnau a’n heffeithiau.

Tai Pawb is a company registered in England and Wales (5282554) and a charity registered with the Charity Commission (1110078).

If you would like to know more about Tai Pawb, and our Strategic Plan, please get in touch:

• info@taipawb.org
• 029 2053 7630
• @TaiPawb