Արմատներով Ղարսից, ծնունդով Ամասիայից, Հայաստանի հյուսիսում մեծացած ու կոփված, քարի պես ամուր կամքով: Ջեմմա Հարությունյանն է: Շիրակի մարզի Ամասիա խոշորացված համայնքի ղեկավարն այսպես է ներկայանում:
Ավանդական հայկական ընտանիքում հարսի աշխատանքին ամուսնուց բացի դեմ չեն եղել նաև սկեսուրն ու սկեսրայրը.
«Երբ ամուսնացա, արդեն աշխատում էի: Հենց Ամասիայում տարբեր պաշտոններ եմ զբաղեցրել` Ջրային տնտեսության ավագ ինժեներ, Շրջսովետի գործկոմի նախագահի տեղակալ, Կադաստրային մարմնի պատասխանատու: Բոլորն էլ գիտեին, որ ես պետք է աշխատեմ: Ընտանիքս հենարանս է, միշտ, ինչ դժվարություն ունեցել եմ, ամուսնուս կողմից աջակցությունը զգացել եմ: Դեռ չի եղել դեպք, որ ես խնդիրներ ունենամ, ու մնամ մենակ»,-ասում է տիկին Ջեմման:
«Որոշեցի, որ պետք է թեկնածությունս անպայման դնեմ: Դե, մարդիկ ինձ ճանաչում էին, ես էլ Ամասիայի կազմի մեջ մտած այդ 9 գյուղերի բոլոր խնդիրներին, մարդկանց էի ծանոթ: Մտածեցի, որ կընտրեն ինձ: Արդեն տարբեր տեղերում իրար հետ գործ ունեցել էինք: Ու ինչպես որ պատկերացրել էի, այդպես էլ եղավ: Իմ ներքին ձայնն ինձ այս անգամ էլ չդավաճանեց»:
Ջեմմա Հարությունյանը սովորական համայնք չի ղեկավարում. Ամասիայի կազմում 9 գյուղ կա: Այդ բոլոր վարչական շրջանների տղամարդ ղեկավարներն ու ավագանու անդամները հաշվի են նստում կին-ղեկավարի հետ: Բայց չի կարելի ասել, թե ամեն ինչ հեշտությամբ է կարգավորվում:
Խոշորացված համայնքի խնդիրներն էլ են խոշոր լինում, և դրանց լուծման համար միշտ չէ, որ մեծ հնարավորություններ կան:
Բայց կենսական նշանակության հարցեր, արդեն իսկ, կարգավորվել են. Ամասիայի կազմում գտնվող 9 գյուղերն էլ ապահովվել են գիշերային լուսավորությամբ:
«Ինչ անում եմ, հաշվի եմ նստում բնակչության կարծիքի և առաջնային կարիքների հետ: Ես միանձնյա որոշումներ չեմ կայացնում: Մարդիկ պետք է ասեն, թե ինչն են այդ պահին համարում կարևոր, որ քննարկենք, հասկանանք, մեր հնարավորությունների սահմաններում լուծումներ գտնենք»:
«Շատ խնդիրներ կան գյուղերում: Հատկապես այս տարի գուղացին վատ վիճակում է, կարկուտը բերք չի թողել, նույնիսկ խոտ չեն կարողանում մարդիկ ամբարել, որ ձմռան ամիսներին անասուններն ուտեն: Թե այս հարցերն ինչպես ենք լուծելու, դեռ չգիտենք»,-մտահոգվում է համայնքապետը:
Դրանից բացի Ամասիայում դեռ տնակներում ապրող մարդիկ կան: Այս տարածաշրջանի եղանակային պայմանները հաշվի առնելով` դժվար չէ պատկարացնել, թե թիթեղյա տնակի մեջ մարդիկ ինչպիսի դժվարություններ են ունենում, որքան վառելիք են օգտագործում, որ հնարավոր լինի ցրտին դիմանալը:
Համայնքապետարնն աշխատանքի միակ վայրը չէ Ամասիայում: Այստեղ բացված բրդի վերամշակման արտադրամասը կայուն աշխատանքով է ապահովելու 60-ից ավելի տեղաբնակի:
Կյանքի իմաստը հողի ու բույսի մեջ է տեսնում: Իր համագյուղացիների նման Ջեմմա Հարությունյանն էլ և’ հող է մշակում, և’ անասուններ պահում: Պաշտոնը տիկնոջը չի հավասարեցրել տղամարդկանց: Վստահ է` դժվարությամբ հաղթահարվող այս ուղին չի ստվերել կանացիությունը:
Արմենուհի Մինասյան