Վահան Տերյանի հայրական տունը, որը թանգարանի է վերածվել 1957 թվականից, գտնվում է փլուզման եզրին, իսկ ցուցասրահն ամբողջությամբ ներկայացնում է կոմունիստական ժամանակաշրջանը: Տուն-թանգարանի տնօրենը բարձրաձայնում է՝ անհապաղ հիմնանորոգում է անհրաժեշտ:
Նինոծմինդայի շրջանի Գանձա գյուղում է Վահան Տերյանի թանգարանը: Հենց առաջին հայացքից աչք է ծագում թանգարանի անտեսված վիճակը՝ խոնավություն, փթած գերաններ, կախված առաստաղ, խունացած նկարներ…
Ցուցասրահի անմիջական հարևանությամբ բանաստեղծի ապրած տունն է, որն ավելի վատթար վիճակում է, որոշ սենյակներ շուտափույթ նորոգման կարիք ունեն:
Տերյանի հայրական տունը 137 տարվա կառույց է: 1957 թվականից է գործող տուն-թանգարանը, որը մինչ օրս որևէ լուրջ վերանորոգման չի ենթարկվել: Եղել են մասնակի, հատվածային վերանորոգումներ, սակայն դրանք համակարգային բնույթ չեն կրել:
«Կոմպլեքս լուծում է պետք, մասնավորաբար, գերանները չեն փոխվել, ինչքան էլ դրանք դիմացկուն լինեն, այնուամենայնիվ ժամանակի քայքայիչ ազդեցությանը չեն դիմանա: Ըստ էության, մասնակի նորոգումները չեն լուծել խնդիրները: Միակ թերևս պահպանության խնդիրը լուծվեց 1984 թվականին, երբ կառուցվեց երկաթե ծածկը, չլիներ այդ ծածկը, հիմա այս տունն ընդհանրապես գոյություն չէր ունենա»,- ասում է Վաղարշակ Թանգամյանը:
«Սա գոյաքարշության հնարավորություն է, որպեսզի փոքրիշատե շտկենք ֆինանսական վիճակը, այստեղ որևէ բան անել հնարավոր չէ», – ասում է Վաղարշակ Թանգամյանը:
Տնօրենը բարձրաձայնում է նաև թանգարանի մասնագետ աշխատակիցների խնդրի մասին:
«Հաշտվել եմ այն մտքի հետ, որ կադրերը թափած չեն և լավ մասնագետ գտնելը այդքան էլ հեշտ գործ չէ, նույնիսկ բուն հայության կենտրոնում մի կարծեք, թե այնտեղ ավելի բարձրակարգ մասնագետ գտնելը հեշտ է: Այս գավառական պայմաններում բավական լուրջ գիտաշխատող ունենք, որից բավական գոհ եմ», – նշում է Թանգամյանը:
Նինոծմինդայի քաղաքապետարանից հայտնում են, 2019 թվականի բյուջեում Վահան Տերյանի տուն-թանգարանի նորոգման համար գումար նախատեսված չէ: Սակայն թանգարանի խնդիները մշտապես գտնվում է քաղաքապետարանի հոգածության ներքո:
«Մենք մշտապես հետաքրքրվում ենք թանգարանի վիճակով, բայց ես գիտեմ, որ քաղաքապետարանում նման ծախսեր նախատեսված չկա: Բայց, եթե տանիքը փթել է, ուրեմն մի բան պետք է արվի, բայց խոսքը հիմնովին նորոգման մասին է, դրա համար պետք է ամբողջ տանիքը բացվի, ամրացվի: Մի խոսքով, հիմնանորոգման պարտավությունն իրենց վրա վերցրին ՀՀ Ազգային ժողովի պատգամավոր Շիրակ Թորոսյանը, «ՋԱՀ» հիմնադրամը և գյուղի բարեգործները: Տերյանական օրվա տոնակատարության ժամանակ իրենք նման հայտարարությամբ հանդես եկան: Այստեղ միայն շենքի փլուզման խնդիրը չէ, նաև էքսպոզիցիան պետք է փոխել, ծավալուն աշխատանք է անհրաժեշտ իրականցնել: Մոտավոր կես միլիոն լարի կպահանջվի այս ամենի համար»,- ասաց Նինոծմինդայի քաղաքապետարանի Մշակույթի, սպորտի և կրթության հարցերով ծառայության պետ Ժորա Սնխչյանը: