Երբ Սիմիդյանից հետաքրքրվեցինք, թե ինչո՞վ է պայմանավորված, որ իշխող մեծամասնական խմբակցության քարտուղարը պասիվ պատգամավոր է, ոչ հարց է տվել մինչ օրս, ոչ ելույթ ունեցել, ոչ էլ որեւէ նախագիծ ներկայացրել 1,5 տարվա ընթացքում՝ նա պատասխանեց. «Պայմանավորված է նրանով, որ խմբակցության քարտուղարի աշխատանքը նաեւ այլ ֆունկցիաներ ունի, որը շատ ժամանակ է ինձնից տանում եւ ելույթների կամ նախագծեր մշակելու ժամանակ չի մնումԼ»: Ճշտեցինք՝ այսինքն, դուք ձեր բուն պատգամավորական գործունեությունը թողած՝ քարտուղարի գո՞րծ եք անում՝ նա պատասխանեց. «Քարտուղարը նաեւ այլ պարտականություններ ունի, որոնցով պայմանավորված՝ ինձնից շատ ժամանակ է տանում այդ աշխատանքը եւ պատգամավորի այլ գործառույթների համար քիչ ժամանակ է մնում: Կարծում եմ, նորմալ բան եմ ասում»:

Սիմիդյանին հարցրեցինք՝ կարո՞ղ է այնպիսի գործ է անում, որը ստվերում է, չենք տեսնում՝ նա պատասխանեց, որ պատգամավորը պետք է իր պարտականությունները կատարի այնքան, որքան իր ժամանակը բավարարում է. «Քաղաքական թիմը պետք է գնահատի այդ պատգամավորի աշխատանքը իր համար կարեւոր է, թե՞ այդ պատգամավորը լավ չի կատարում իր պարտականությունը»:

Մեր զարմանքին, որ ախր քաղաքական թիմը չպետք է գնահատի, պետք է գնահատեն իր ընտրողները, քաղաքացիները, որոնք իրեն ձայն են տվել ու բերել են ԱԺ, աշխատավարձ են վճարում, իրենց համար պիտի՞ տեսանելի լինի, թե ինչ է անում Հակոբ Սիմիդյանը: Նա արձագանքեց. «Ես ասացի, թե ինչով է պայմանավորված իմ պատգամավորական այլ գործառույթների պասիվությունը: Հիմա դա նաեւ քաղաքացիները կգնահատեն՝ նորմա՞լ է, թե՞ նորմալ չի եւ հետո իրենց գնահատականը ես կտեսնեմ»:

Մենք նաեւ հետաքրքրվեցինք, թե կոնկրետ ի՞նչ է անում Սիմիդյանը, որ ժամանակ չի մնում բուն պատգամավորական գործունեությամբ զբաղվելու համար: Նա բացատրեց, որ կազմակերպչական աշխատանքներ է անում, մեծ խմբակցություն ունեն, խմբակցության նիստերն է կազմակերպում, օրակարգերը կազմում, դրանց արդյունքում ձեւավորված ծրագրերն իրականացնում եւ այլն: Մանրամասները՝ տեսանյութում:

Հռիփսիմե ՋԵԲԵՋՅԱՆ