Loading

სოციალური პოლიტიკა თელავში- პრობლემები და გამოწვევები ავტორები: მაკა ხაზიური, ვასილ ბაბუაშვილი

80 წლის ზინა ენუქაშვილი თელავში მარტო ცხოვრობს. მძიმე სოციალური პირობებიდან გამომდინარე მას ხშირად საჭმლის და წამლის საყიდელი ფული არ აქვს. ის 10 წელზე მეტია ყოველდღიურად უმწეოთა და უპოვართა სასადილოს სტუმრობს და თავისი წილი საკვები სახლში მიაქვს.

ზინა ამბობს, რომ გარდა საკვებისა, მას ზამთარში გასათბობად შეშა სჭირდება, რომლის მისაღებადაც წელს მერიას მიმართა, თუმცა უშედეგოდ.

იგი ამბობს, რომ მერიის სოციალური პროგრამები გაუმართავია და სხვადასხვა სახის დახმარებით სწორედ ის ადამიანები ვერ სარგებლობენ, ვისაც ნამდვილად სჭირდება.

ზინა ენუქაშვილის მსგავსად მძიმე სოციალურ პირობებში უწევთ ცხოვრება სხვა სოციალურად დაუცველ მოქალაქეებს.

ისინი ამბობენ, რომ საკვები პროდუქტები და წამლები გაძვირდა, მათი ერთადერთი დახმარება კი უმწეოთა და უპოვართა სასადილოდან მიღებული ერთი ადამიანის სამყოფი საკვებია, რომლითაც ხშირად ოჯახის წევრებსაც კვებავენ.

თელავში მცხოვრები მათიკო ლოლაძე სასადილოს ყოველდღე სტუმრობს, აქედან წაღებული საჭმლით კი შვილებს და შვილიშვილებს კვებავს. იგი ამბობს, რომ სოციალური დახმარება და პენსია კომუნალურ გადასახადებსა და წამლებში არა ყოფნის.

80 წლის მარტოხელა ლენა ლეკიშვილი წლებია ყოველ დილით უმწეოთა სასადილოს მიერ დაქირავებული კურიერისგან მიტანილ საკვებს ელოდება. მისი თქმით, აღნიშნული დახმარება მისთვის მნიშვნელოვანია.

ლენა ასევე სხვა სოციალური პროგრამებითაც სარგებლობს.

თელავის მუნიციპალიტეტის მერიას დაქვემდებარებული ა(ა)იპ ,,უმწეოთა და უპოვართა სამსახური“ და სასადილო მუნიციპალიტეტში ყოველდღიურად 435 ბენეფიციარს აწვდის საკვებს.

დაწესებულებაში განმარტავენ, რომ 80 ბენეფიციარს სპეციალურად დაქირავებული კურიერი საკვებს სახლში აწვდის.

სამსახურის ხელმძღვანელი ნინო აფციაური აცხადებს, რომ 2019 წელს ადგილობრივი ბიუჯეტიდან 359 000 ათასი ლარით დაფინანსდნენ, ხოლო მომავალი წლისთვის აღნიშნული თანხის გაზრდა იგეგმება, რომ მათ 600-მდე ბენეფიციარის დახმარება შეძლონ.

არასამთავრობო ორგანიზაცია ,,მედია ცენტრი კახეთის“ პროექტის ,,ინტერმუნიციპალური სოციალური პოლიტიკის მხარდაჭერა კახეთის რეგიონში“ ფარგლებში, გურჯაანის, თელავისა და ყვარლის მუნიციპალიტეტებში სოციალური პროგრამების საჭიროებათა კვლევა ჩატარდა. მომზადდა ინტერმუნიციპალური სოციალური პოლიტიკის დოკუმენტი, რაც ხელს შეწყობს გააზრებული და ეფექტური სოციალური პოლიტიკის დანერგვას ადგილობრივ დონეზე.

ორგანიზაციის წარმომადგენლების თქმით, აღნიშნული დოკუმენტი თვითმმართველობებს დაეხმარება დახვეწონ სოციალური პროგრამები და მოარგონ ისინი მოსახლეობის საჭიროებებს.

პროექტის ფარგლებში ჩატარებული კვლევის ფარგლებში, გამოიკვეთა სხვადასხვა სახის ხარვეზები და პრობლემები, რომელიც ხელს უშლის მუნიციპალიტეტის მიერ სოციალური პოლიტიკის უკეთ წარმართვას და ბენეფიციარებზე მორგებული მომსახურების გაწევას.

სოციოლოგი და კვლევის ავტორი თამარ ზურაბიშვილი განმარტავს, რომ მუშაობისას გამოიკვეთა სოციალური პროგრამების ახლებური სტრატეგიის და სამოქმედო გეგმის შემუშავების აუცილებლობა, რომელიც ფოკუსირებული იქნება გრძელვადიანი და მდგრადი შედეგების მიღწევაზე.

მისი განმარტებით, გამოიკვეთა ასევე სოციალური პროგრამების მოსარგებლეთა არსებული ელექტრონული ბაზების გამართვის ან ახალი ბაზების გაკეთების საჭიროება.

,,მედია ცენტრი კახეთის” დირექტორის, მაია მამულაშვილის თქმით, პროექტის მიზანია სოციალურ სექტორში მრავალმხრივი პარტნიორობის ხელშეწყობა მუნიციპალიტეტების სამოქალაქო სექტორსა და ბიზნესს შორის სოციალური სერვისების სისტემის გაუმჯობესების გზით.

თელავის მუნიციპალიტეტის მერი, შოთა ნარეკლიშვილი განმარტავს, რომ 2020 წლის ბიუჯეტიდან სოციალური და ჯანდაცვის მიმართულებით დაფინანსება 630 000 ლარით გაიზრდება.

მისივე თქმით, ბიუჯეტის პროექტის განხილვა საკრებულოს კომისიებში მიმდინარეობს, შემდეგ მერიას შენიშვნებით დაუბრუნდება, რომელსაც უწყება გაითვალისწინებს და საბოლოოდ დასამტკიცებლად კვლავ საკრებულოს გაუგზავნის.

თელავის მუნიციპალიტეტის მერიაში განმარტავენ, რომ სწორედ მოქალაქეთა აქტიურობით და არასამთავრობო ორგანიზაციების ჩართულობით მოხდება სოციალური პროგრამების სრულყოფა, რომელიც მეტად მორგებული იქნება სოციალურად დაუცველ მოსახლეობაზე.