Loading

პრესა „ხალხის მტრების“ წინააღმდეგ როგორ იყენებდა პრესას სახელმწიფო სადამსჯელო მანქანა რეპრესიების გასამართლებლად

ამ ადამიანებს „ხალხის მტრებს“ უწოდებდნენ. ისინი დახვრიტეს, წლების შემდეგ კი მათ ოჯახებს უთხრეს, რომ ისინი უდანაშაულონი იყვნენ.

ეს ბოლშევიკი ჟურნალისტის დახასიათებაა. ის საბჭოთა მოქალაქეებს „ხალხის მტრებზე“ უამბობს.

„გაზეთის თანამშრომლებად უნდა იყვნენ მხოლოდ კომუნიზმის ერთგული ადამიანები. ნამდვილ ბოლშევიკ-ჟურნალისტს არ შეუძლია დაიცვას დამპალი ნეიტრალიტეტი. იგი ვალდებულია ყოველგვარი საშუალებით მიაღწიოს იმას, რომ მისი სიტყვა პარტიის დასაცავად გაგონებულ იქნას.“ [„საბჭოთა აჭარა“, 1937 წლის 28 ივლისი]

გაზეთი „საბჭოთა აჭარა“, სტალინის ფოტო პირველ გვერდზე. 1938 წელი

„ხალხის მტერი“ შეიძლება იყოს ნებისმიერი ადამიანი, მუშა, კოლმეურნე თუ პარტიის წევრი. პრესამ იგი სასტიკად უნდა დაგმოს.

НКВД-ეს მუშაკი უსწორდება „ხალხის მტერს“ - საბჭოთა მხატვრის, ბორის ეფიმოვის კარიკატურა. წყარო: svoboda.org

საზოგადოებრივი აზრი რომ შეიქმნას, საჭიროა პრესამ აჩვენოს, რომ საბჭოთა კავშირის მშრომელი ხალხი მტკიცედ გმობს „ხალხის მტრებს“ და მათ სასტიკად გასამართლებას ითხოვს.

გაზეთი „საბჭოთა აჭარა“, 1937 წლის აგვისტო

ყველას უნდა ეშინოდეს შინსახკომის, იგივე შინაგან საქმეთა სახალხო კომისარიატის! - შიშის გაძლიერებაზე პრესამ უნდა იზრუნოს.

ვიდეო: ამონარიდი „საბჭოთა აჭარაში“ გამოქვეყნებული სტატიიდან.

არავის შეუძლია იყოს მშვიდად. იჭერენ პარტიის წევრებსა და თანამდებობის პირებსაც.

ამ მწვავე, კრიტიკული სტატიის ავტორი აჭარის განათლების კომისარი, ილიას ქათამაძეა. სტატიის გამოქვეყნებიდან ოთხი თვის შემდეგ ქათამაძე დააპატიმრეს საბჭოთა ხელისუფლების დამხობის ბრალდებით. მიუსაჯეს დახვრეტა ქონების კონფისკაციით. რეაბილიტირებულია სიკვდილის შემდეგ.

ილია ქათამაძის სტატია. „საბჭოთა აჭარა“, 1937

ტოტალური შიშის დასანერგად იმართება საჩვენებელი სასამართლო პროცესები. აჭარაში ასეთია ზექერია ლორთქიფანიძისა და მასთან ერთად დაკავებული პირების სასამართლო, რომელიც რადიოტრანსლირებით გადაიცემა ბათუმში.

„საბჭოთა სასამართლომ ზექერია ლორთქიფანიძესა და მასთან ერთად დაკავებულ პირებს გამოუტანოს სასიკვდილო განაჩენი!“ - ამ მოწოდებით სრულდება 1937 წლის ზაფხულში „საბჭოთა აჭარაში“ გამოქვეყნებული, სხვადასხვა თემაზე მომზადებული სტატიები.

ზექერია ლორთქიფანიძე და მასთან ერთად ბრალდებული 7 ადამიანი დახვრიტეს 1937 წლის სექტემბრის ბოლოს.

1956 წელს, სტალინის სიკვდილის შემდეგ, ყველა მათგანი რეაბილიტირებულ იქნა. ოჯახებმა მიიღეს შეტყობინება, რომ საქმე შეწყვეტილია დანაშაულის ნიშნების არარსებობის გამო.

ფოტოზე: შუაში - ზექერია ლორთქიფანიძე

ამ სტატიაში ბათუმის დეპოს თანამშრომელი, კოპლატაძეა სასტიკად გაკრიტიკებული. სტატიის გამოქვეყნების დროს კოპლატაძე უკვე დაპატიმრებული იყო. დახვრიტეს 1937 წლის 17 სექტემბერს. რეაბილიტირებულია 1958 წელს, საქმე შეწყდა დანაშაულის ნიშნების არარსებობის გამო.

ეშინია ყველას. საშიშია ლაპარაკი მათზე, ვინც უკვე დახვრიტეს ან გადაასახლეს.

ფოტო 1937 წელს დაკავებული პირის ოჯახის ფოტოალბომიდან. ტოტალური შიშის გამო ფოტოდან ამოჭრილია 1937-1938 წლებში რეპრესირებული ადამიანები.

„ხალხის მტრის“ იარლიყისგან არც ბოლშევიკი ჟურნალისტია დაზღვეული.

1937 წლის „ძირგამომთხრელი საქმიანობისთვის“ დააკავეს გაზეთ „საბჭოთა აჭარის“ განყოფილების გამგე აკაკი ხვინგია. დახვრიტეს 11 დეკემბერს.

1938 წელს დააპატიმრეს გაზეთის დროებითი რედაქტორი ალექსანდრე გოლიაძე. მიუსაჯეს დახვრეტა პირადი ქონების კონფისკაციით. განაჩენი სისრულეში მოიყვანეს 1938 წლის 19 იანვარს.

ორივე მათგანი რეაბილიტირებულია.

ირაკლი თოიძის პოსტერი. წყარო: sovietpropaganda.org

ეს 1937-1938 წლებში საქართველოში დახვრეტილ პირთა სტატისტიკაა, თუმცა შესაძლოა „ხალხის მტრის“ იარლიყით დახვრეტილთა რაოდენობა ამაზე მეტიც იყო.

ია ფრანგიშვილის ინფოგრაფიკა

სტატისტიკის მიღმა „ხალხის მტრებად“ შერაცხული ის ადამიანები არიან, რომელთა შთამომავლებს მათგან მხოლოდ რამდენიმე ფოტო და უკვე გაცრეცილი მოგონება შემორჩათ.

Report Abuse

If you feel that this video content violates the Adobe Terms of Use, you may report this content by filling out this quick form.

To report a copyright violation, please follow the DMCA section in the Terms of Use.