Ro-ràdh
Tha a’ Phàrlamaid air mòran a choileanadh anns a’ chiad 18 bliadhna aice. Tha i a-nis air tighinn gu ìre mar bhuidheann, aig a bheil làn thaic a’ phobaill. Tha an t-àm ann a-nis coimhead ris an àm ri teachd, a bhith a’ toirt fa-near soirbheas na Pàrlamaid gu ruige seo agus a bhith a’ togail air eisimpleirean de dheagh chleachdadh air chor ’s gum bi i cho èifeachdach ’s a ghabhas agus i a’ gabhail ri dleastanasan ùra.
Nuair a thug an t-Oifigear Riaghlaidh dhuinn fiathachadh lèirmheas a dhèanamh air obair na Pàrlamaid, bha mise agus mo cho-luchd-obrach air a’ choimisean mothachail gum b’ e am prìomh uallach againn a dhèanamh cinnteach gum biodh a’ Phàrlamaid uidheamaichte a choinneachadh ris na dùbhlain ri thighinn. Tha an obair againn air dearbhadh dhuinn gu bheil feum ann airson ath-leasachaidhean a chur an gnìomh gu clis.
Tha na molaidhean againn ag amas air èifeachdas agus comas na Pàrlamaid a mheudachadh mar sheòmar singilte, taghte aig a bheil earbsa anns na prionnsabalan bunaiteach aice. Air an gabhail còmhla, tha iad a’ co-neartachadh àite nan comataidhean is àite an t-seòmair a thaobh reachdas a sgrùdadh agus an Riaghaltas a chumail cunntachail, agus tha iad ag amas air com-pàirteachadh poblach air feadh na dùthcha a leasachadh.
Tha sinn ag aithneachadh gum bi na cumhachdan a bharrachd a’ sìneadh nan goireasan a tha aig a’ Phàrlamaid an-dràsta, ach tha sinn a’ creidsinn nach biodh e reusanta a bhith a’ moladh dara seòmar, no meudachadh ann an àireamh nam BPA, mura tèid a shealltainn gu bheil a’ Phàrlamaid a-cheana ag obair aig uas-mheud èifeachdachais. Tha sinn air molaidhean a dhèanamh air mar a dh’fhaodadh seo a bhith air a dhèanamh.
Iain MacCarmaig
Cathraiche
Geàrr-chunntas na aithisge
A’ siubhal air feadh na dùthcha, chuala sinn gu bheil bheil spèis mhath ga toirt don Phàrlamaid. Bho 1999, tha i air deagh adhartas a dhèanamh air lìbhrigeadh an amais gum biodh i fosgailte, com-pàirteachail, a’ roinn chumhachdan agus cunntachail, le co-ionannachd cothroim don h-uile duine. Dh’fhaodar barrachd a dhèanamh, ge-tà, gus an t-amas sin a choileanadh.
Anns an aithisg againn, tha sinn a’ dèanamh mòran mholaidhean mionaideach a bhiodh a’ lìbhrigeadh, nan robh iad uile air an cur an gnìomh, leasachaidhean cudromach ann an èifeachdas na Pàrlamaid. Gu cudromach, faodaidh na h-atharrachaidhean seo a bhith air an dèanamh anns an t-seisean sa, nuair a dh’fhaodadh, tha argamaid ann, a’ Phàrlamaid a bhith a’ cur aghaidh ris an dùbhlan as motha a bh’ aige riamh a thaobh sgrùdaidh.
PÀRLAMAID NAS TREASA A’ DÈANAMH CONALTRADH RI POBALL NA H-ALBA
Bhiodh na molaidhean againn a’ lìbhrigeadh:
• Barrachd sùbailteachd agus deòntas ann an gnothaichean an t-seòmair, a’ cur ri cothroman com-pàirteachaidh ann an deasbadan agus a’ meudachadh cunntachalachd nam Ministearan;
• Pròiseas de sgrùdadh reachdais nas fheàrr, le sgrùdadh ro-reachdail is eàrr-reachdail agus cruthachadh Buidheann airson Inbhean Reachdail;
• Comataidhean nas lugha agus nas treasa, air an stiùireadh le luchd-gairm taghte leis a’ Phàrlamaid gus an neo-eisimeileachd is an smachd aca a chomharrachadh, a bhiodh na bu chomasaiche air buaidh a thoirt air a’ chlàr-ghnothaich, seach a bhith dìreach a’ freagairt ris an Riaghaltas;
• Pàrlamaid nas èifeachdaiche, a’ leigeil le comataidhean agus an seòmar coinneachadh aig an aon àm agus a’ dèanamh feum nas fheàrr de ruitheam na bliadhna pàrlamaidich;
• Àite meudaichte airson nam BPA fa leth a bhith a’ toirt buaidh air, agus a’ cur ri, gnothaichean pàrlamaideach, agus iad air am brosnachadh a bhith nam pàrlamaidich air thùs is air thoiseach;
• Àite nas treasa airson an Oifigeir Riaghlaidh a stiùireadh ghnothaichean pàrlamaideach agus a dhèanamh cinnteach gu bheil sgrùdadh èifeachdach, cunntachalachd agus deasbad ann;
• Sealladh ath-nuadhaichte airson Pàrlamaid a tha co-ionann agus iom-dhòigheach, le comharraidhean-beinge airson trusadh BPA bho bhuidhnean gun an riochdachadh iomchaidh, fhad ’s a thathar a’ dèanamh cinnteach gu bheil cùisean iomadachd a’ fàs gu bhith nam pàirt nas siostamataigeache de sgrùdadh;
• A’ fàs mar cheannard ann an conaltradh poblach, a’ feuchainn dhòighean ùra gus beachdan is fianais a thional agus a’ cruthachadh tuilleadh chothroman airson daoine a bhith a’ gabhail pàirt, far as àill leotha agus mar as àill leotha;
• A’ toirt tuilleadh taic do chomataidhean, am measg nithean eile le bhith a’ cruthachadh Aonad Conaltradh nan Comataidhean;
• Ag obair le daoine òga gus barrachd eòlas air a’ Phàrlamaid a bhrosnachadh, a’ togail nan cnap-starraidhean a tha a’ bacadh dhaoine bho thuigsinn dè tha a’ Phàrlamaid a’ dèanamh agus a’ gabhail brath air teicneòlasan didseatach gus conaltradh a leasachadh le daoine air feadh na dùthcha;
• Sgrùdadh agus measadh nas èifeachdaiche de dh’obair na Pàrlamaid, le fios air ais dhaibhsan a tha a’ gabhail pàirt, air chor ’s gun toirear gu buil leasachadh agus conaltradh a chumas a’ dol.
Faodaidh tu an aithisg iomlan a leughadh air an làrach-lìn againn.